تكنيكات للإنتظار…

الفترة  اللي فاتت كنت باستنى حاجات كتير أحيانا كنت باضطر استنى حاجة تحصل لساعات و ساعات طويلة جدا

بقيت شاطرة أوي في الانتظار ، على الرغم من إني باكرهه بس اكتشفت شوية تكنيكات خاصة بيه بتساعدني ان وقت الانتظار يعدي بسرعة

التكنيك الأولى: بأخلي حركتي بطيئة ، يعني لو رايحة اقعد بامشي بشويش ، لو هشرب حاجة باشربها على مهلي ، الأكل يبقى بالراحة و هكذا…

التكنيك الثاني: لو الانتظار ده في مكان فيه ناس كتير باعمل الأول مسح شامل عليهم ، و بعدين دايماً بلاقي حد وجوده و سلوكه بيفرض عليه إني اركز معاه اكتر من الباقيين ، أحياناً بيكون الموظف اللي بيشتغل  ومش طايق نفسه ، الفاكهاني اللي أنا راكنة قدامه ، الأم الي قاعدة جنبي و عمالة  تزعق في ابنها… كل مرة بطل شكل باسميهم أبطال فترة الاتنظار  ، لكن أحياناً مابيكونش في حد ينفع يكون بطل فترة انتظار، فباضطر استخدم تكنيك تاني

التكنيك الثالت: لو المكان اللي منتظرة فيه ينفع اقرأ فيه كتاب ، عادة بيكون معايا كتاب و ده تكنيك جميل جداً لمرور فترة الانتظار بسلام ، مبحبش أوي اسمع موسيقى في ودني على أي جهاز عشان بافضل أكون سامعه و حاسة باللي حواليه.

التكنيك الرابع:  ده بقى اكتر تكنيك باحبه بيعدي الوقت بسرعه لو مستنية  حاجة أو حد ، أو لو ماشية لوحدي مشوار طويل ، انا باسميه تكنيك استرجاع الذكريات ، ببساطة باختار مواقف معينة حصلت مع ناس باحبها و افضل استرجع ادق التفاصيل للمواقف دي اللبس ، الجو ، كنا فين ، الكلام اللي حصل و ردودي عليه ، و هل الرد ده مناسب و لا لأ ، طب و لو الموقف اتكرر هارد نفس الرد و لا هقول ايه ، حتى الروايح المرتبطة بالموقف ده استرجعها ، لو في بحر لو ريحة بارفان معين، و عادة آخرة التكنيك ده اني باتصل بالشخص بطل الاسترجاع اسلم عليه ….

التكنيك الخامس : و ده آخر تكنيك ساعات كده و أنا مستنية ، بلاقي مخي سرح  و أخدت قرارات مهمة في حياتي بخطوات واضحة و مرتبة جدا  ، المشكلة إن التكنيك ده حاجة شبه الإلهام كده لازم ييجي لوحده ، ماعرفش استدعيه بارادتي

 

فيه فترات انتظار بتبقى خليط من كل التكنيات السابقة ، و فيه فترات انتظار باركز فيها على تكنيك واحد منهم

الحاجة المشتركة بقى بين كل فترات الانتظار ، إن الوقت الأخير قبل ما الحاجة اللي مستنياها تحصل بيكون أطول وقت و مفيش أي تكنيك بينفع فيه ، مفيش حاجة بتنفع غير ان عنيه تفضل  على الساعة ، لغاية ما الوقت يعدي !!