فضفضة بعد طول غياب ..

بقالي كتير مكتبتش …وحشتني الكتابة

مفيش فكرة معينة عايزة اكتب عنها اكتر من إني عايزة أطلع اللي حوايا في صورة كلمات …

جات عليه فنرة في الأيام اللي فاتت كنت باتخيل اني باكلم أِشخاص أو أشياء في سري …

يعني مثلا…

كنت بأقول للطفل الرضيع: من حكمة ربنا أنه خلقك ضعيف و لا حيلة لك و لا قوة عشان تلاقي رحمة و عطف من اللي حواليك، عشان يزرع أول بذرة حب في قلب أمك و أبوك ، ضعفك يخليهم يحموك بعنيهم …كل ما الإنسان يحس إن اللي قدامه محتاج له أكتر و بقاءه متعلق بيه اكتر ، كل ما يحبه أكتر…يمكن لو كنت اتخلقت كبير من الأول …كان هيفوتك كتير

ضعفك دلوقتي …هو سر بهاءك

كنت بأقول للغربة: ياما ريحتي ناس و ياما تعبتي ناس تانية ، بس ميزتك الوحيدة اللي مايختلفش عليها اتنين إنك ساعات بتخلي البني آدم خفيف ، بتخلي الناس التانية تشتاق له ، محدش بيشتاق غير للحاجة البعيدة ، فيه ناس عاشت و ماتت من غير ما حد يشتاق لها ..!!!

كنت باقول للي يبان من بره غني و شبعان و هو من جوه روحه لسه جعانه : أعرف أميزك من وسط مليون ..تعرف من إيه ؟؟؟ من طريقة معاملتك للي ربنا إداك سلطة عليهم…ساعتها بس بتبان قد ايه أنت روحك لسه جعانه

كنت بأقول للي فاكر نفسه أكبر من أي غلط : مفيش ملايكة على الأرض …مفيش حد كبير على الغلط … بس ادعِ ربنا يسترها عليك .

كنت بأقول لنفسي : مش لازم العمل يكون كبير أوي عشان يبان تأثيره …ساعات تراكم أعمال صغيرة فوق بعضها بيكون تأثيره أكبر بكتير …اتعلمي تعملي أعمال صغيرة …!